عزيزي المواطن بتاع النضال
يا راكب دماغك و غاوي الحلال
نصيحة يا صاحبي بلاش الخيال
و غمض عيونك و ربى العيال
بلاش المناكفة و لايم و عيش
هتتعب معانا و سهمك يطيش
نلفق لاهلك قضية حشيش
و تصبح حكاية و نكتة و مثال
تعالى و هاودنا و عدى الأمور
و عيش في الطراوة و خش الطابور
لكن لو هتزعل و دمك يفور
هنشهد نهايتك في بحر الرمال
هتصبح حرامي هتصبح أمير
هتصبح حرامي و ندل و أجير
و نقدر نلخبط في أصلك كتيير
و جدك شحاتة هيصبح شحال
هنحلف إن الحبايب شافوك
بتقبض يا خاين و تقتل اخوك
ساعتها مراتك هتلعن ابوك
و تلطم و تنعى احط الرجال
مالكش انت دعوة ايه اللى ضاع
و مين اللى شارى و مين اللى باع
و مين اللى كيل و مين اللى شال
فحب الحكومة و حب السلام
و علم ولادك يشدوا الحزام
علشان بكرة هياكلو حمام
و ينسوا الاسية و ينسوا الهزال
فلازم يا صاحبى تغمض عنيك
و طنش علينا نطنش عليك
و اياك تشاور نقطع ايديك
و تصبح مواطن ما يسواش ريال
عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال
موضوع: رسالة حب من الحكومة لابنها المواطن 
الإثنين ديسمبر 08, 2008 1:26 pm
